ਮਜੀਠਾ/ ਅੰਮ੍ਰਿਤਸਰ (ਸਰਬਜੀਤ, ਪ੍ਰਿਥੀਪਾਲ, ਜ. ਬ.)-ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਦੀ ਪ੍ਰਸਤਾਵਿਤ ਅੰਮ੍ਰਿਤਸਰ ਫੇਰੀ ਤੋਂ ਐਨ ਪਹਿਲਾਂ ਮਾਝੇ ਵਿਚ ਕਾਂਗਰਸ ਪਾਰਟੀ ਨੂੰ ਅੱਜ ਉਸ ਵੇਲੇ ਜ਼ਬਰਦਸਤ ਝਟਕਾ ਲੱਗਾ ਜਦੋਂ ਜ਼ਿਲਾ ਕਾਂਗਰਸ ਕਮੇਟੀ ਅੰਮ੍ਰਿਤਸਰ ਦਿਹਾਤੀ ਦੇ ਮੀਤ ਪ੍ਰਧਾਨ ਤੇ ਨਗਰ ਕਮੇਟੀ ਮਜੀਠਾ ਦੇ ਸਾਬਕਾ ਪ੍ਰਧਾਨ ਨਾਨਕ ਸਿੰਘ ਮਜੀਠੀਆ ਆਪਣੇ 300 ਹਮਾਇਤੀ ਪਰਿਵਾਰਾਂ ਸਮੇਤ ਕਾਂਗਰਸ ਪਾਰਟੀ ਤੋਂ ਅਸਤੀਫ਼ਾ ਦੇ ਕੇ ਸ਼੍ਰੋਮਣੀ ਅਕਾਲੀ ਦਲ ਵਿਚ ਸ਼ਾਮਿਲ ਹੋ ਗਏ । ਸ਼ਾਮਿਲ ਹੋਣ ਵਾਲਿਆਂ 'ਚ ਮਜੀਠਾ ਬਲਾਕ ਕਾਂਗਰਸ ਕਮੇਟੀ ਦੇ ਸਾਬਕਾ ਪ੍ਰਧਾਨ ਦੁਰਗਾ ਦਾਸ ਪਟਵਾਰੀ ਵੀ ਸਨ।
ਅੱਜ ਦਾਣਾ ਮੰਡੀ ਮਜੀਠਾ ਵਿਖੇ ਹੋਏ ਵਿਸ਼ਾਲ ਸਮਾਗਮ ਦੌਰਾਨ ਪੰਜਾਬ ਦੇ ਮਾਲ ਤੇ ਲੋਕ ਸੰਪਰਕ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਨੇ ਸ਼੍ਰੋਮਣੀ ਅਕਾਲੀ ਦਲ ਵਿਚ ਸ਼ਾਮਿਲ ਹੋਣ ਵਾਲਿਆਂ ਦਾ ਸਿਰੋਪਾਓ ਭੇਟ ਕਰਕੇ ਸਵਾਗ਼ਤ ਕੀਤਾ। ਉਨ੍ਹਾਂ ਨੇ ਨਾਨਕ ਸਿੰਘ ਮਜੀਠਾ, ਬਲਾਕ ਮਜੀਠਾ ਕਾਂਗਰਸ ਕਮੇਟੀ ਦੇ ਸਾਬਕਾ ਪ੍ਰਧਾਨ ਸ਼੍ਰੀ ਦੁਰਗਾ ਦਾਸ ਪਟਵਾਰੀ ਤੇ ਉਨ੍ਹਾਂ ਦੇ ਸਾਥੀਆਂ ਨੂੰ ਜੀ ਆਇਆਂ ਆਖਦਿਆਂ ਕਿਹਾ ਕਿ ਉਂਝ ਤਾਂ ਭਾਵੇਂ ਸਮੁੱਚੇ ਪੰਜਾਬ ਵਿਚ ਹੀ ਲੋਕ-ਵਿਰੋਧੀ ਕਾਂਗਰਸ ਪਾਰਟੀ ਪੂਰੀ ਤਰ੍ਹਾਂ ਸੁੰਗੜ ਚੁੱਕੀ ਹੈ ਪਰ ਮਾਝੇ ਵਿਚ ਇਸ ਦੇ ਖਾਤਮੇ ਦਾ ਅਮਲ ਸ਼ੁਰੂ ਹੋ ਚੁੱਕਾ ਹੈ। ਕੈਬਨਿਟ ਮੰਤਰੀ ਨੇ ਕਿਹਾ ਕਿ ਕੇਂਦਰ ਵਿਚ ਕਾਂਗਰਸ ਦੀ ਅਗਵਾਈ ਵਾਲੀ ਸਰਕਾਰ ਦੇ ਹਰ ਰੋਜ਼ ਸਾਹਮਣੇ ਆ ਰਹੇ ਘਪਲਿਆਂ, ਲੱਕਤੋੜਵੀਂ ਮਹਿੰਗਾਈ, ਕਾਲੇ ਧਨ, ਭ੍ਰਿਸ਼ਟਾਚਾਰ ਤੇ ਹੋਰ ਕਾਲੇ ਕਾਰਨਾਮਿਆਂ ਕਰਕੇ ਦੇਸ਼ ਭਰ ਵਿਚ ਇਸ ਪਾਰਟੀ ਖ਼ਿਲਾਫ ਲੋਕ-ਲਹਿਰ ਬਣ ਰਹੀ ਹੈ ਤੇ ਅਗਲੀਆਂ ਲੋਕ ਸਭਾ ਚੋਣਾਂ ਵਿਚ ਜਨਤਾ ਇਸ ਪਾਰਟੀ ਨੂੰ ਕੇਂਦਰ ਦੀ ਸੱਤਾ ਤੋਂ ਧੂਹ ਕੇ ਲਾਂਭੇ ਸੁੱਟ ਦੇਵੇਗੀ।
ਮਜੀਠੀਆ ਨੇ ਕੇਂਦਰ ਸਰਕਾਰ ਵਲੋਂ ਪੰਜਾਬ ਨਾਲ ਹੁਣ ਤਕ ਕੀਤੇ ਜਾਂਦੇ ਰਹੇ ਵਿਤਕਰਿਆਂ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਜਿਹੜੇ ਕਾਂਗਰਸੀ ਹੁਣ ਪੰਜਾਬ ਦੀ ਵਿੱਤੀ ਹਾਲਤ ਮਜ਼ਬੂਤ ਕਰਨ ਲਈ ਲਾਏ ਗਏ ਮਾਮੂਲੀ ਟੈਕਸਾਂ ਸਬੰਧੀ ਵਾਵੇਲਾ ਖੜ੍ਹਾ ਕਰ ਰਹੇ ਹਨ, ਉਨ੍ਹਾਂ ਨੂੰ ਚਾਹੀਦਾ ਹੈ ਕਿ ਉਹ ਕੇਂਦਰ ਵਲੋਂ ਉਗਰਾਹੇ ਟੈਕਸਾਂ ਵਿਚੋਂ ਰਾਜ ਨੂੰ ਮਾਮੂਲੀ 1. 29 ਫ਼ੀਸਦੀ ਹਿੱਸਾ ਦੇਣ, ਕਿਸਾਨਾਂ ਦਾ ਕਰਜ਼ਾ ਨਾ ਮੁਆਫ਼ ਕਰਨ, ਰਾਜ ਦੇ ਕਿਸਾਨਾਂ ਨੂੰ ਸੋਕਾ ਰਾਹਤ ਫੰਡ ਨਾ ਦੇਣ ਤੇ ਪੰਜਾਬ ਸਿਰ ਚੜ੍ਹਿਆ ਕਰਜ਼ਾ ਨਾ ਮੁਆਫ਼ ਕਰਨ ਖਿਲਾਫ਼ ਸੋਨੀਆ ਗਾਂਧੀ ਦੇ ਘਰ ਦੇ ਬਾਹਰ ਬੈਠ ਕੇ ਧਰਨੇ ਦੇਣ। ਉਨ੍ਹਾਂ ਕਿਹਾ ਕਿ ਕਾਂਗਰਸੀਆਂ ਦੇ ਇਸੇ ਦੋ-ਮੂੰਹੇਂ ਕਿਰਦਾਰ ਕਰਕੇ ਹੀ ਅੱਜ ਕੈਪਟਨ ਨੂੰ ਧਰਨਿਆਂ ਵਾਸਤੇ ਬੰਦੇ ਨਹੀਂ ਲੱਭ ਰਹੇ। ਇਸ ਮੌਕੇ ਅਕਾਲੀ ਦਲ 'ਚ ਸ਼ਾਮਿਲ ਹੋਏ 300 ਪਰਿਵਾਰਾਂ ਦੀ ਅਗਵਾਈ ਕਰਨ ਵਾਲੇ ਜ਼ਿਲਾ ਕਾਂਗਰਸ ਕਮੇਟੀ ਦਿਹਾਤੀ ਦੇ ਪ੍ਰਧਾਨ ਤੇ ਨਗਰ ਕਮੇਟੀ ਮਜੀਠਾ ਦੇ ਸਾਬਕਾ ਪ੍ਰਧਾਨ ਨਾਨਕ ਸਿੰਘ ਮਜੀਠਾ ਨੇ ਕਿਹਾ ਕਿ ਉਨ੍ਹਾਂ ਕਾਂਗਰਸ ਵਲੋਂ ਮਹਿੰਗਾਈ, ਘਪਲਿਆਂ, ਭ੍ਰਿਸ਼ਟਾਚਾਰ ਵਰਗੀਆਂ ਅਲਾਮਤਾਂ ਪੈਦਾ ਕਰਨ ਤੇ ਗ਼ਰੀਬ-ਮਾਰੂ ਨੀਤੀਆਂ ਲਾਗੂ ਕਰਨ ਦੇ ਵਿਰੋਧ ਵਜੋਂ ਇਹ ਫੈਸਲਾ ਲਿਆ ਹੈ।  ਇਸ ਮੌਕੇ ਜਥੇ. ਸੰਤੋਖ ਸਿੰਘ ਸਮਰਾ, ਚੇਅਰਮੈਨ ਰਜਿੰਦਰ ਕੁਮਾਰ ਪੱਪੂ, ਚੇਅਰਮੈਨ ਹਰਵਿੰਦਰ ਸਿੰਘ ਭੁੱਲਰ, ਤਲਬੀਰ ਸਿੰਘ ਗਿੱਲ, ਨਗਰ ਕਮੇਟੀ ਮਜੀਠਾ ਦੇ ਪ੍ਰਧਾਨ ਸਲਵੰਤ ਸਿੰਘ ਸੇਠ, ਸ਼੍ਰੋਮਣੀ ਕਮੇਟੀ ਮੈਂਬਰ ਜੋਧ ਸਿੰਘ ਸਮਰਾ, ਜਥੇ. ਬਲਬੀਰ ਸਿੰਘ ਚੰਦੀ, ਸਾਬਕਾ ਚੇਅਰਮੈਨ ਅਵਤਾਰ ਸਿੰਘ ਬੱਲ, ਉੱਪ ਚੇਅਰਮੈਨ ਬਾਪੂ ਰਘਬੀਰ ਸਿੰਘ ਭੰਗਵਾਂ, ਮੇਜਰ ਸ਼ਿਵੀ ਬਰਾੜ, ਰਾਕੇਸ਼ ਪਰਾਸ਼ਰ, ਸੁਖਦੀਪ ਸਿੰਘ ਸਿੱਧੂ, ਮਨਜੀਤ ਸਿੰਘ ਭੋਮਾ, ਸੁਰਿੰਦਰਪਾਲ ਸਿੰਘ ਗੋਕਲ, ਬੀਬੀ ਧੰਨੀ, ਮੁਖਵਿੰਦਰ ਸਿੰਘ, ਤਰੁਣ ਅਬਰੋਲ, ਦੇਸ ਰਾਜ, ਜਥੇ. ਬਲਵਿੰਦਰ ਸਿੰਘ ਨਾਗ਼, ਪਿੰਕਾ ਮਜੀਠਾ, ਰਾਜੇਸ਼ ਕੁਮਾਰ ਲਾਟੀ, ਬਲਜੀਤ ਸਿੰਘ ਹਮਜ਼ਾ, ਸਰਪੰਚ ਦਵਿੰਦਰ ਸਿੰੰਘ ਜੌਹਲ, ਕੁੱਕਾ ਮਸੀਹ, ਮੁਖਤਾਰ ਸਿੰਘ ਚਾਟੀ, ਹਰਪਾਲ ਸਿੰਘ ਮਜੀਠਾ, ਸਰਪੰਚ ਨਿਰਮਲ ਸਿੰਘ ਨਾਗ਼ ਨਵੇਂ ਤੇ ਜੈਪਾਲ ਮਹਾਜਨ ਆਦਿ ਵੀ ਮੌਜੂਦ ਸਨ।